අධ්‍යාපන පර්යේෂණ මිතුරු ශෛලියෙන් (54) ප්‍රතිචලිතතා පර්යේෂණ (Replication research) මගින් පර්යේෂණ ප්‍රතිකෘතකරණය

1.       ගුරු භූමිකාවෙහි සංවර්ධනයට මෙන් ම ඒ සඳහා අවශ්‍ය පදනම සපයන පාසල් අධ්‍යාපන ක්‍රමයේ සංවර්ධනයට ද ඇවැසි යෝජනා පර්යේෂණ පාදක ව ඉදිරිපත් කෙරුණු පොතක් කියවීමි.  එනම් Eric Jensen (2009) ලියූ Teaching with poverty in mind: What being poor does to kids' brains and what schools can do about it. Alexandria, Virginia: ASCD. යන කෘතියයි.

2.       බටහිර රටක දුප්පත්කමට සහ අධ්‍යාපනයට සම්බන්ධ සංකල්ප ද න්‍යාය ද පදනම් කර ගෙන ලියැවුණු නිසා මේ කෘතියේ අදහස්, ශ්‍රී ලංකාවට අදාළ කර ගත යුතු අයුරු හඳුනා ගැනීමට, ප්‍රතිචලිතතා පර්යේෂණ (Replication research)  කළ යුතු ව තිබේ.  ප්‍රතිචලිතතා පර්යේෂණ (Replication research) යනු, විදේශ රටක හෝ තම රටේ ම හෝ පෙර කළ පර්යේෂණයක්,  වෙනත් රටක හෝ තම රටේ ම වෙනත් සන්දර්භයකට කෙතරම් අදාළ දැයි හඳුනා ගැනීමට, නැවත එම  පර්යේෂණය කිරීමයි.  නැවත පර්යේෂණය කරන විට, පෙර පර්යේෂණයේ දී භාවිත කළ පර්යේෂණ ක්‍රමවේදය සහ පර්යේෂණ ක්‍රියාවලිය එසේ ම භාවිත කළ යුතු වුව  ද පර්යේෂණය කෙරෙන රටේ ව්‍යූහාත්මක ලක්ෂණ පදනම් කර ගෙන පර්යේෂණයේ දත්ත රැස් කිරීමේ උපකරණ, සමහර විට, විකරණය (Modify) කළ යුතු ව තිබේ.   හෙවත්  රටේ භාෂාව, සංස්කෘතික වටපිටාව, ජාතිය, ආර්ථික ක්‍රමය වැනි විචල්‍ය පදනම් කර ගෙන පර්යේෂණ උපකරණවල අන්තර්ගතය සුපහන් (Refine) කර ගත යුතු ව තිබේ. දත්ත රැස් කරන නියැදිය හෝ සහභාගි වන්නන් නම් අලුතින් ම තෝරා ගත යුතු අතර එහි දී රටේ ව්‍යූහාත්මක ලක්ෂණ නියෝජනය වන පරිදි නියැදිය තේරීමේ ක්‍රමය ද වෙනස් කර ගත හැකි ය.

3.       එරික් ජෙන්සන් ලියූ කෘතිය නාභිගත වන්නේ ශාස්ත්‍රීය සාධනය සහ පහළ සමාජාර්ථික මට්ටම අතර සම්බන්ධය ගැනයි. ඒ අනුව කරුණු තුනක් අවධාරණය කර ඇත. 

·         දුප්පත්කමට නිරන්තර ව නිරාවරණය වීමෙන්, මොළය කායික විද්‍යාත්මක ව අනර්ථකාරී ලෙස වෙනස් වේ.

·         මොළය සකස් ව ඇත්තේ, ලබන අත්දැකීම් අනුව හැඩ ගැසීමට නිසා, මොළය  වඩා හොඳ තත්ත්වයකට පරිවර්තනය කළ හැකි ය. වෙනත් පදවලින් කිව හොත් දුප්පත් පරිසරවල ළමයින්ට චිත්තවේගීය, සමාජ, සහ ශාස්ත්‍රීය සාර්ථක බව ලැබිය හැකි ය.

·         ශාස්ත්‍රීය සාධනයට බොහෝ සාධක බලපෑවත්, දුප්පත්කම සහිත ව වැඩුණු ළමයින්ගේ පරිවර්තනය සඳහා සමහර කරුණු ප්‍රබල ව වැදගත් වේ (2 වන පිටුව).

4.       සාර්ථක පාසල්, මේ ගැටලුව විසඳීමේ දී සමෝධානය වූ ප්‍රවේශයක් භාවිත කර තිබේ. එහෙත් ජෙන්සන් ස්වකීය කෘතියේ දී, පැහැදිලි කිරීම සහ සරලභාවය සඳහා සමෝධානික ප්‍රවේශය, පාසල් ප්‍රවේශය සහ පන්ති ප්‍රවේශය ලෙස කුලක දෙකකට බෙදා තිබේ. අනතුරු ව ඒ ඒ කුලකයේ කරුණු පහක් බැගින් දක්වා තිබේ.  කරුනු පහ ඇරඹෙන මුල් අකුරු එකතු කර SHARE යන නම ද ප්‍රෙව්ශයට දී තිබේ. ඒ අනුව පාසල් තලයේ සාර්ථක සාධක පම මෙසේ ය.

·         Support of the whole child

·         Hard data

·         Accountability

·         Relationship building

·         Enrichment mind-set

පන්තිකාමර මට්ටමේ සාර්ථක සාධක පහ මෙසේ ය.

·         Standard-based curriculum and instruction

·         Hope building

·         Arts, Athletics, and advanced placement

·         Retooling of the operating system

·         Engaging instruction

5.       කෘතියේ ඇති, ලංකාවට අදාළ කර ගත හැකි තවත් අදහස් දෙකක් මෙසේ ය.

• ·         පාසල් වයසේ උෘන සාධනය සහිත ඕනෑම ළමයින් කණ්ඩායමක් සමග වැඩ කිරීමේ දී මතකයේ තබා ගත යුතු, වඩාත් තීරණාත්මක සංකල්පය නම් මොළය වෙනස් වන බවත් වෙනස් කළ හැකි බවත් ය. මොළය සැලසුම් වී තිබෙනුවේ වෙනස් වීමට ය. එහෙත් මොළය වෙනස් වන්නේ විවිධාකාරයෙනි. අලුත් භාෂාවක් ඉගෙන ගැනීමේ දී මොළය ක්‍රමානුකූල ව වෙනස් වේ. එසේ ම -ආ ඇත්ත නේන්නම්- ලෙස එක් වර ම වචන පිට වී අවබෝධය ලැබී, ක්ෂණික ව මොළය වෙනස් වන අවස්ථාත් දක්නට ලැබෙන්නේ ය.  පෝෂණය, ව්‍යායාමය, ඉගෙනුම ක්‍රමානුකූල ව ලැබීමෙන් මොළයේ ධනාත්මක වෙනසක් ඇති වේ. දිගු කල් නොසලකා හැරීම, මත්දුව්‍ය ඇබ්බැහිය, පීඩාව නිසා මොළයේ වන වෙනස ඍණ වේ. (47 වන පිටුව).

• ·         තීරණාත්මක වෙනස සඳහා පූර්ව අවශ්‍යතාව වනුයේ ඔබට ඒ සඳහා ඇති විශ්වාසයයි.  පළමු කොට ඔබ ම වෙනස් වීම සඳහා ඔබට ඇති කැමැත්තයි. ළමයින් ගැටලු (problem) ලෙස නො ව හැකියාව ඇත්තන් (possibility) ලෙස සලකන්න. වෙනස කළ හැකි යයි විශ්වාස කරන්න.මොළය යනු හික්මවිය හැකි දෙයක් බවත් පරිසරයෙන් දෙන දැයට අනුවර්තනය වන්නක් බවත් තේරුම් ගන්න (65 වන පිටුව).

මේ කෘතියේ ඇමරිකා එක්සත් ජනපදයේ දුප්පත්කම ද පහළ සමාජ ආර්ථික තත්ත්වය (low socio economic status) යන අදහස ද අර්ථනිරූපණය කර ඇති ආකාරය ශ්‍රී ලංකාවට එයාකාරයෙන් ම අදාළ නො වේ. එනිසා දුප්පත්කම යන සංකල්පය, ශ්‍රී ලංකාව පදනම් කර ගෙන අර්ථනිරූපණය කිරීම අවශ්‍ය වේ. මොළය ආශ්‍රිත ව කළ පර්යේෂණ සඳහා නම්, මා දන්නා තරමින්, දියුණු ශාස්ත්‍රීය පරිසරයක් ශ්‍රී ලංකාවේ නැත.

අධ්‍යාපන පර්යේෂණ මිතුරු ශෛලියෙන් (53) උපදේශකගේ භූමිකාවට එදිරි ව පර්යේෂකගේ භූමිකාව

1. මයිකල් ජැක්සන් සහ ලයනල් රිචී විසින් 1985 දී නිර්මාණය කර ගයනු ලැබූ, ක්වින්සි ජෝන්ස් විසින් නිෂ්පාදනය කරන ලද, We are the world යන ප්‍රසිද්ධ සහ ජනප්‍රිය ගීතය,  හයිටි රටේ ස්වාභාවික ආපදාවලින් විපතට පත් ජනයාට ආධාර පිණිස 2010 වර්ෂයේ දී නැවත නව නිර්මාණයක් සේ ගැයුණු අයුරුත් එයට ගායක-ගායිකා කණ්ඩායමක් විසින් දායකත්වය දෙනු ලැබූ අයුරුත් නරඹන්න. කණ්ඩායමේ සියලු දෙනා ම ගයන්නේ එක ගීතයකි. ඒ නිසා ගීතයේ සමස්ත අරමුණ ද ස්වර රටා ද තාලය ද  රැක ගෙන ගයන්නට සියලු දෙනා බැඳී සිටිති. එහෙත් ගීතයේ අපූරු ලක්ෂණය වන්නේ එක් එක් ගායකයා හෝ ගායිකාව ස්වකීය ගායන ශෛලිය රැක ගෙන තමන්ට හුරු කට හඬේ පහත්-උස් ස්වර ද රැක  ගෙන, ගීතයේ අනන්‍යතාවට හානි නො වන අයුරින්  ගායනයට සම්බන්ධ වීමයි. මීට අමතර ව ගායක ගායිකාවන්ගේ මුහුණුවල ගායන ඉරියව් ද මයික්‍රෙෆෝනයට ළං -ඈත් වන අයුරු ද ගැයුමේ දී මුහුණු සහ ශාරිරික ඉරියව් පවත්වන අයුරු ද එකිනෙකාට වෙනස් ය. ඇඳුම පැළඳුම ද එකිනෙකාට ආවේණික වූ  වෙනස් රටා සහිත ය.  

තව ලෙසකින් අර්ථනිරූපණය කර කිව හොත්, ගීතයේ නිර්මාතෘවරුන්, විවිධ ගායකයන්ගේ විවිධ රටා ඒකාග්‍ර කර ගෙන, එක් වැදගත් පණිවිඩයක් ජනනය කිරීම සඳහා ගීතයක් නිර්මාණය කර ඇත.

2. පර්යේෂණකරණයේ දී ද, පර්යේෂකයන් හැසිරෙන්නේ හෙවත් පර්යේෂණ භූමිකාව ඉටු කරන්නේ තම තමන්ට අයත් ශෛලිය අනුව ය. එහෙත් එහි දී පර්යේෂණ ක්‍රමවිද්‍යාෙවහි මූලිකාංග කඩ නො වන ආකාරයට, ස්වකීය පර්යේෂණ භූමිකාව ඉටු කළ යුතු ය. ගීතයේ සමස්ත අරමුණට ද ස්වර රටාවලට ද තාලයට ද  රිද්මයට ද හානි නො වන සේ, විවිධ ශෛලිවලින් ඒ ඒ ගායකයා-ගායිකාව ගයමින් ගායනයට සම්බන්ධ වන්නා සේ ය.
3.  ගීතයේ 3.50වන කාලය ඇරඹෙන විට, ෂෙලින් ඩියොන් යන ප්‍රසිද්ධ ගායිකාව උච්ච ස්වරයෙන් ගයන අයුරු ද සංගීත කණ්ඩායම මෙහෙයවන්නා ඇයට මග  පෙන්වන අයුරු ද නිරීක්ෂණය කරන්න. උපදේශකගේ සිතේ ගීතයේ රිද්මය කෙතරම් රුඳී තිබුණත්, ඒ අනුව කෙතරම් හොඳින් ගායිකාවට මග පෙන්වුවත්, නිසි ස්වර රටා රැක ගෙන,  ගීතය නිවැරදි ව ගායනා කිරීමෙහි වගකීම ඇත්තේ ගායිකාවට ය. ඒ සදහා කැප වී පුරුදු පුහුණු වීම ගායිකාවගේ කාර්යයයි.  මෙයාකාරයෙන් පර්යේෂණ උපදේශකගේ සිතේ ඇති පර්යේෂණ ඉලක්කය සහ ඉහළ ම පර්යේෂණ රාමුව සාක්ෂාත් කර ගැනීමේ ලා උපරිම ව කැප වී පර්යේෂණයේ නියැළීමෙහි වගකීම ඇත්තේ ද පර්යේෂකට ය. ඒ පදනම මත පර්යේෂණය කළ යුතු වන්නේ මෙසේ යයි මග පෙන්වන්නකුට-උපදේශකට,  උපදෙස් දෙන්නට හැකි නමුත් සැබවින් ම පර්යේෂණය කළ යුතු වන්නේ ගායකයා හෝ ගායිකාව නැමැති පර්යේෂක ම ය. 

අධ්‍යාපන පර්යේෂණ මිතුරු ශෛලියෙන් (52) පර්යේෂණ ක්‍රියාවලියේ යථාර්ථ රේඛාව

1. පාඨමාලා අවශ්‍යතා සඳහා පර්යේෂණයක් කරන්නට අරඹන ආධුනිකයකු, ටිකට්පතක් ගෙන ඈත නගරයකට යන්නට පිටකොටුවේ දුම්රිය පොළට පිවිසුණු මගියකුට සමාන ය. ආධුනිකයකුට ස්වකීය පශ්චාද් උපාධිය පිළිබඳ අපේක්ෂාවක් තිබුණත්, පශ්චාද් උපාධියට අවශ්‍ය පර්යේෂණය කරන ආකාරය නිශ්චිත ව අපැහැදිලි ය. දුම්රියපළට පළමු වරට පිවිසි නවක මගියාට කුමන වේදිකාවට පිවිසිය යුතු ද යනු ගැන  දැනුමක් නැත්තා සේ ය. පාඨමාලාවට අදාළ උපදෙස් සංග්‍රහයට සමාන ව, දුම්රිය පොළට පිවිසෙන දොරටු අසල ඉහළින් දුම්රිය වේදිකා පිළිබඳ විස්තර ඇතත්, ඒ අනුව, අදාළ වේදිකාවට විධිමත් ව (පඩිපෙළ හා වේදිකා දිගේ යාම)  හෝ අවිධිමත් ව (අවශ්‍ය ම තැන ආරක්ෂිත ව රේල් පාර පැන යාම) යන්නට තාම මනා හුරුවක් ලැබී නැත.
2. මේ හුරුව ලද පසු සහ ඒ අනුව දුම්රියට ගොඩ වූ පසු, ආධුනික පර්යේෂකයකු පසු කරන දුම්රිය මාර්ගවල රටා ද, ඔහු යා යුතු පර්යේෂණ මාර්ගය පෙන්වනසුලු ය. කොළඹ කොටුවෙන් පිටත් වූ පසු ද මරදානට ළඟා වී ටික දුරක් යන තුරු ද මගියාට දක්නට ලැබෙනුයේ දුම්රියමාර්ග ජාලාවකි. ඒ අනුව කුමන පාරේ දුම්රිය යන්නේ ද යනු අපැහැදිලි ය. පර්යේෂණයට අදාළ තේමාව සහ දළ මාතෘකාව හඳුනා ගත් පසු, නිශ්චිත ව පර්යේෂණ අරමුණු හෝ පර්යේෂණ ප්‍රශ්න හෝ කල්පිත ගොඩ නගා ගන්නා තෙක්, පර්යේෂක සිටිනුයේ ද මේ අවිනිශ්චිත අවධියේ ය.   පර්යේෂණ සාහිත්‍ය විමර්ශනය පදනම් කර ගෙන නිශ්චිත ව පර්යේෂණ අරමුණු හෝ පර්යේෂණ ප්‍රශ්න හෝ කල්පිත ගොඩ නගා ගත් පසු ද පර්යේෂණ ක්‍රමවේදය ගොඩ නඟා ගත් පසු ද නම් ගමන් මාර්ගය පැහැදිලි වන්නේ ය.  මෙහි දී මුහුණු පොත් ජාලයේ පළ කෙරුණු 1 වන රූපය උපුටා දක්වන්නට කැමති නමුත් දුම්රිය පාර  මා මෙහි දී සමාන කරන්නේ ස්‍ත්‍රී-පුරුෂ මොළවලට නො වේ. පර්යේෂණ ක්‍රියාවලියේ ඉහත අවස්ථා දෙකට, එනම් පර්යේෂණ ක්‍රියාවලියේ පියවරක් වන 'ක්‍රමවිද්‍යාව' හඳුනා ගන්නට පෙර සහ පසු අවධියට  ය. ඒ අනුව 2 හා 3 වන රූප දෙස බලන්න. (3 වන රූපයට මූලාශ්‍රය: The Alaska railroad, lined on either side by pink fireweed wildflowers, George Parks Highway, Alaska Wall Art. From: National Geographic, By: Rich Reid)
3. පර්යේෂණ ක්‍රමවේදය පරිච්ඡේදය ගොඩ නඟා ගෙන, පර්යේෂණ ගමන් මාර්ගය පැහැදිලි කර ගත්තත් ඉන් පසු ද පර්යේෂක ගමන් කරන මාර්ගය ඍජු හෝ අඛණ්ඩ නො වන්නේ ය. දුම්රියක්, විවිධ තැන්වල, සිග්නල් නැති ව නවත්වන්නා සේ ය. සමහර විට මගියකු දුම්රියට හසු වුණ හොත්-පැන්න හොත් ගමන වැඩිපුර ප්‍රමාද වන්නේ ය.  පර්යේෂකගේ පෙෘද්ගලික පවුල්  පරිසරයෙන් ද රාජකාරි පරිසරයෙන් ද ඇති වන විවිධ බාධක මෙන් ම මනසෙහි ඇති වන උත්තේජනයේ අඩුවැඩි වීම් ද අනුව පර්යේෂණය අවසන් කිරීම දක්වා යන මාර්ගය පහළ බැසීම් හා ඉහළ නැඟීම් සහිත වන්නේ ය (4 වන රූපය). Gerard Guthrie විසින් පෙන්වා දෙනු ලැබ ඇති  'පර්යේෂණයේ යථාර්ථ රේඛාව', පර්යේෂකයකුගේ ගමන් මග අපූරුවට නිරූපණය කරන්නේ ය.

අධ්‍යාපන පර්යේෂණ මිතුරු ශෛලියෙන් (51) ශ්‍රේෂ්ඨ ගුරුවරයාට එදිරි ව තාක්ෂණය (Teacher vs technology) පරදින අයුරු

(අ) 2018 මැයි මස පළ වූ John D. Couch (ඇපල් සමාගමේ අධ්‍යාපනය පිළිබඳ පළමු වන උප සභාපති), Jason Towne සමග ලියූ  Rewriting education: How technology can unlock every student's potential (අධ්‍යාපනයට නව විදුලි රැහැන් ඇදීම:  තාක්ෂණයට සෑම ශිෂ්‍යයකුගේ ම ශක්‍යතාව මුදාලිය හැක්කේ කෙසේ ද) යන කෘතියේ විශේෂත්වයක් වනුයේ තාක්ෂණයට තිබිය යුතු ස්ථානය, අධ්‍යාපන විද්‍යාත්මක ව කැටි කර තිබීම ය.  කෘතියේ   "Teaching උගැන්වීම" යන 12 වන පරිච්ඡේදයේ සඳහන් පහත සඳහන් ඉංග්‍රීසි වාක්‍ය 6 කියවන්න. ඊට මා කළ දළ සිංහල පරිවර්තනයේ වාක්‍ය 6ත් බලන්න.

p.172

Great teaching cannot be replaced by technology.  The only thing technology can do effectively in a classroom is supplement good teaching. The best technology on the planet doesn't even come close to being able to do the things that great teachers can do...

...The goal of educational technology isn't to teach, but to empower teachers to be more effective and efficient. Even the best - designed artificial intelligence  in the world will never have the one thing possessed by great teachers - heart.

p.173

While technology certainly has the potential to transform both education and students, it takes great teachers to actually unlock it. 

විශිෂ්ට ඉගැන්වීම වෙනුවට,  තාක්ෂණය ආදේශ කළ නො හැකි ය. තාක්ෂණයට පන්තිකාමරයේ ඵලදායි ව කළ හැකි එක ම දේ, හොඳ ඉගැන්වීමකට ඇවැසි  අඩුපාඩු සැකසීමේ උෘනපූරණය  පමණී. විශිෂ්ට ගුරුවරුන්ට කළ හැකි දැයට ආසන්නයටවත් පැමිණ යමක්  කරන්නට පෘථිවියේ ඉතා ම හොඳින් සංවර්ධනය වූ තාක්ෂණයට නො හැකි ය...

...අධ්‍යාපන තාක්ෂණයේ පරමාර්ථය ඉගැන්වීම නො වේ; වඩාත් ඵලදායි සහ කාර්යක්ෂම ගුරුවරුන් වීමට ගුරුවරුන් බලවන්ත කිරීම ය. ලෝකයේ ඉතා ම හොදට සැලසුම් කළ කෘත්‍රීම  බුද්ධියටවත්, ශ්‍රේෂ්ඨ ගුරුවරුන් සතු එක් දැයක් වන -හදවත- කවදාවත් හිමි නො වනු ඇත.

තාක්ෂණයට අධ්‍යාපනය මෙන් ම ශිෂ්‍යයන් ද වෙනස් කළ හැකි ශක්‍යතාව නිශ්චිත ව ම ඇතත් ඒ සඳහා වන දොරඅගුඵ සැබවින් ම විවර කළ යුත්තේ ශ්‍රේෂ්ඨ ගුරුවරුන් ම ය. 

(ආ) දැන් අපට ශ්‍රී ලංකාවේ පාසල්වලට තාක්ෂණය හඳුන්වා දීමේ රාමුව ගැන ප්‍රත්‍යවේක්ෂණය කළ හැකි ය. පර්යේෂණ කිරීමට උචිත තේමා ද පර්යේෂණ ක්‍රම ද හඳුනා ගත හැකි ය.

• තාක්ෂණය පාසල්වල භාවිතය පිළිබඳ ශ්‍රී ලංකාවේ අධ්‍යාපන ප්‍රතිපත්තිය කුමක් ද? (ප්‍රතිපත්ති පර්යේෂණයකි)
• තාක්ෂණය පාසල්වල භාවිතය පිළිබඳ පවතින රටා මොනවා ද? (සමීක්ෂණ පර්යේෂණයකි)
• සෙල්ෆෝන් භාවිතය පිළිබඳ ව පාසල් සාමාජිකයන් සහ ප්‍රජා සාමාජිකයන් දරණ අදහස්වල රටා මොනවා ද? (සංසිද්ධිවිද්‍යා පර්යේෂණ)
• පරිගණක භාවිත කරන හා නො කරන ගුරුවරුන්ගේ පාඩම්වල ගුරු නිර්මාණාශීලි බව වෙනස් වන්නේ ද? (සම්පරීක්ෂණ පර්යේෂණ)
• පරිගණක භාවිත කරන හා නො කරන ගුරුවරුන්ගේ පාඩම් සහ ශිෂ්‍ය ක්‍රියාශීලි බව, අවධානය, පාඩමට සහභාගිත්වය යන විචල්‍ය අතර සහසම්බන්ධයක් වේ ද? (සහසම්බන්ධන පර්යේෂණ)
• කඵලෑල්ල/පරිගණකය නිර්මාණාත්මක ව භාවිත කරන ගුරුවරකු සතු රටා මොනවා ද? (ප්‍රත්‍යෙක අධ්‍යයන)
• නව තාක්ෂණික උපකරණ භාවිතයට අවශ්‍ය ඇස-අත-හිස සමායෝජන නිපුණතා ලබා දීමට උචිත ක්‍රියාකාරකම් පළමු වන ශ්‍රේණියේ විෂයමාලාවට ඇතුළත් ද? (සන්ධාර විශ්ලේෂණය)
• පරිගණකයේ විනිවිදක පටල භාවිතයෙන් පාඩම් උගැන්වීමට අරඹන ගුරුවරයකු, ක්‍රමානුකූල ව එහි දී ලබන තමාගේ ම සංවර්ධනය අභිමන්ත්‍රණය (monitor) කරන්නේ කෙසේ ද? (ක්‍රියාමූලික පර්යේෂණ)
• 6 වන ශ්‍රේණියට පිවිසෙන ශිෂ්‍ය කණ්ඩායමක්, ටැබ් භාවිතයට වර්ෂය ඇතුළත දී හුරු වන රටා මොනවා ද? (අන්වායාම අධ්‍යයන)
• විදුහල්පති-ගුරුවරුන්-සේවකයන් පාසල්වෙලාවේ දී මොබයිල් දුරකථන භාවිත කරන ආකාරයේ රටා කෙබඳු ද? (මානවවංශ විවරණ)
• අපොස (සාපෙ) විභාග ප්‍රතිඵල පැමිණි පසු, ළමයින් අසමත් වුණේ තාක්ෂණය භාවිත නො කළ නිසා යයි අදහසක් කියැවේ. මෙය සත්‍ය ද? (පශ්චාද් සාධක හෙවත් හේතු තුලනාත්මක පර්යේෂණ)

අධ්‍යාපන පර්යේෂණ මිතුරු ශෛලියෙන් (50) එඵවකු සේ කෑ ගසන ළමයින්ගේ අනාගතය ගැනත් සිතමු

Shakira Isabel Mebarak Ripoll හෙවත් කෙටියෙන් Shakira යනු දකුණු ඇමරිකාවේ කොලම්බියා රටෙහි උපන් ගී පද රචිකාවකි; නැටුම් ශිල්පිණියකි; ගායිකාවකි. 2010 ලෝක පාපන්දු කුසලාන තරගයේ දී "Waka Waka (This Time for Africa) " යන  නිල ගීතය නිර්මාණය කර ගයනු ලැබුවේ ඇය විසි නි.  ලොව වැඩියෙන් ම ජනප්‍රිය වූ ලෝක පාපන්දු කුසලාන ගීතය එයයි. ලෝකයේ වැඩියෙන් ම විකිණී-නරඹා ඇති ගීතයක් වන්නේ ද එයයි. මෙවන් අන්තර්ජාතික තලයේ අතිසාර්ථක ගායිකාවක දෙස, පාසල් සමයේ සංගීත ගුරුතුමිය බලා ඇත්තේ කෙලෙස ද?

කුඩා කල Shakira  කතෝලික පාසලක ඉගෙනුම ලැබුවා ය.  2 වන ශ්‍රේණියේ ඉගෙනුම ලබන කල, සංගීත ගුරුතුමිය, ඇය ව  පාසලේ ගීතිකා කණ්ඩායමට බදවා ගැනීම ප්‍රතික්ෂේප කළා ය.  ගුරුතුමිය දැක්වූ හේතුව, ඇයගේ කටහඩෙන් නිකුත් වන කම්පනය ඕනෑවට වඩා ප්‍රබල වීමයි.  ගුරුතුමිය තවදුරටත්  දැරිවියට පවසා ඇත්තේ ඇය "එඵවකු" සේ හඬ නගන බව ය. Shakira ශිෂ්‍යාව අතික්‍රියාශීලි චර්යා (hyperactivity) නිසා, දඬුවම් ලෙස  නිතර ම පන්තියෙන් එළියට ද යවා ඇත. මේ ඍණ යයි සිතන කරුණු දෙක දෙස, ධනාත්මක ව බලන්නටත් ඒ අනුව  පිළියම් යොදන්නටත් පාසල් පරිසරය කටයුතු නො කළ බව පැහැදිලි ය. එහෙත් සමාජය Shakiraගේ ශක්‍යතාව තේරුම් ගත්තේ ය. ඒ නිසා සමාජය අද දන්නේ Shakira ගැන ය. ඇයට ඉගැන්වූ සංගීත ගුරුතුමිය හෝ සංගීත ගුරුතුමිය විසින් දක්ෂ යයි තේරූ ළමයින් ගැන නො වේ. 

ශ්‍රී ලංකාවේ ද ගුරුවරුන් විදුහල්පතිවරුන් නිලධාරින් මෙන් ම දෙමාපියන් ද, සිසුන්ගේ විකල්ප චර්යා  දෙස ඍණ දාෂ්ටියෙන් බලන බවට උදාහරණ ඇත.  මුහුණු පොතේ විවිධ පිටුවල විවිධ පුවත්වලින් ද සමහර විට ඒ ගැන කියැවේ. "අපේ පාසලේ ඉන්නේ තේරිච්ච ළමයින්", "හොඳ ළමයින් නගරෙට යනවා", "දක්ෂ ළමයින් ශිෂ්‍යත්වෙන් පාස් වෙලා ගියා. අපට ඉතුරු වුණේ මැට්ටො ටික" වැනි ප්‍රකාශ පාසල්වල පුන පුනා ප්‍රකාශ වන අදහස් ය. 

පළාත් -කලාප අතර විභාග ප්‍රතිඵල සංසන්දනය කර තම පළාතේ - කලාපයේ ප්‍රතිඵල හොඳ යයි උදම් අනන අය ද සිටිති. එහෙත් ඒ පළාත්-කලාපවල, විභාග අසමත් වේ යයි සිතා, එනිසා ම පළාතේ ප්‍රතිඵලවලට බලපෑමක් වේ යයි සිතා, විවිධ උපක්‍රමවලින් විභාගයට ඉදිරිපත් නො කරන අසරණ ළමයින්ගේ අයිතිවාසිකම් සහ සිතිවිලි ගැන නම් කවුරුත් කතා කරන්නේවත් පෙනී සිටින්නේවත්  නැත. උචිත ප්‍රතීකාරී පියවර ද ගන්නේ නැත.  එසේ ම විභාග ප්‍රතිඵල නිකුත් වූ වහා ම, හොඳින් සමත් වූ සිසුන් ගැන අයිතිවාසිකම් කීමට බොහෝ අය සිටිති. එහෙත් අසමත් වූ සිසුන් ගැන වගකිව යුතු වන්නේ ළමයින් ම සහ දෙමාපියන් ම පමණී. නිලධාරින්ට අනුව නම් ගුරුවරුන් පමණී. ප්‍රතිඵල නිකුත් වූ පසු පවත්වන රැස්වීම්වල දී, ගුරුවරුන් නැගිට්ටවමින් ප්‍රශ්න නගන නිලධාරිහූ, තමන් පාසල්වල "චාරිකාවේ" යෙදී, අත්සන් කොට ගන්නා දීමනා නිසාවත්, ප්‍රතිඵල ඉහළ නො ගියේ ඇයි දැයි කියා නම්, ප්‍රත්‍යවේක්ෂණය නො කරති.   

මේ ප්‍රවණතා ගැන, මා ද ඇතුළත් ව,  අප එක් එක් අය සතු සීමිත ලෝක දැක්ම අනුව මෙන් ම පටු හැඟීම් අනුව ද තවදුරටත් අදහස් පළ කිරීම උචිත නැත. ඒ සඳහා විවිධ දෘෂ්ටිකෝණ (viewpoints)  හා පර්යාලෝක (perspectives)  අනුව ද පවතින පර්යේෂණ  දැනුම අනුව ද තීරණ ගෙන ක්‍රියාත්මක කළ යුතු ය. ඒ අනුව  පන්තිය සහ පාසල සදහා ද සමස්ත අධ්‍යාපන ක්‍රමය සදහා ද අනාගතය සඳහා ද වඩාත් උචිත සැලසුම් සකස් කිරීමට පදනම සැකසීම සඳහා, ප්‍රතිපත්ති පර්යේෂණ (policy research) කිරීම, ගුරුවරුන් - විදුහල්පතිවරුන් - නිලධාරින් මෙන් ම අප සැමගේ ද  වගකීම වන්නේ ය.  මේ සඳහා නැගිය හැකි ප්‍රශ්න කිහිපයක් මෙසේ ය.

·         ගුරුවරයකුට පන්තියේ දී හමු වන අමුතු ගතිලක්ෂණ/ඉගෙනුම් රටා  සහිත ළමයින් සතු ලක්ෂණ මොනවා ද? (මේ කරුණු උදාහරණ සහිත ව ලිවීම මගින්, ළමයින් ගැන දත්ත එක්රැස් වෙයි.)

·         අමුතු ගතිලක්ෂණ/ඉගෙනුම් රටා  යන ප්‍රතිඵලය සදහා බලපෑ සාධක මොනවා ද?

·         අමුතු ගතිලක්ෂණ, සාමාන්‍ය චර්යා ලක්ෂණවලට පරිවර්තනය කිරීම සඳහා පන්තිකාමර ක්‍රියාවලි වෙනස් කර ගන්නේ කෙසේ ද?

·         නැත හොත් අමුතු ගති ලක්ෂණවලට උචිත ලෙස පන්තිකාමර ක්‍රියාවලි සකස් කර ගන්නේ කෙසේ ද?

·         අමුතු ගති ලක්ෂණවලට උචිත උපදෙස් විෂයමාලා ද්‍රව්‍යවල සපයා ඇත්ද?

·         අමුතු ගති ලක්ෂණ සහිත ළමයින්ට ඉගැන්වීමට අදාළ ගුරු  සංවර්ධන වැඩසටහන් ක්‍රියාත්මක කර ඇත් ද?

·         අමුතු ගති ලක්ෂණවලට උචිත වූ විසඳුම්, පාසල් නිරීක්ෂණයට එන නිලධාරින්ට තිබේ ද?

·         අමුතු ගති ලක්ෂණ මිනුමට, පවතින විභාග ප්‍රශ්න පත්‍ර ක්‍රමය ප්‍රමාණවත් ද?

·         අමුතු ගති ලක්ෂණ සහිත ළමයින් සම්බන්ධයෙන් විවිධ රටවල පවතින ප්‍රතිපත්ති මොනවා ද?

·         විභාග ප්‍රශ්නපත්‍ර සකස් කරන්නේ විද්‍යාත්මක ව මිනුම් ඇගයුම් මූලධර්ම අනුව ද?   

·         විභාග ප්‍රතිඵල, ශිෂ්‍යයා සහ ගුරුවරයා මනින එක ම නිර්ණායකය විය යුතු ද?